ٹرمپ کی نئی ترجمان کیٹی زکریا کی وکالت کی اسناد پر سوالات

گذشتہ ہفتے امریکی صدر ڈونلڈ ٹرمپ نے ان کی تقرری کا اعلان کرتے ہوئے انھیں وکیل قرار دیا تھا، جبکہ کیٹی زکریا بھی ماضی میں خود کو وکیل بتاتی رہی ہیں۔ مگر اب ان کی قانونی اسناد پر سنگین سوالات اٹھ کھڑے ہوئے ہیں۔

کیٹی زکریا نے رواں ہفتے وائٹ ہاؤس پریس سیکرٹری کی ذمہ داریاں سنبھالی ہیں۔ وہ کیرولین لیویٹ کی جگہ آئی ہیں جو اگست میں وائٹ ہاؤس چھوڑ گئی تھیں۔

بی بی سی اور رائٹرز کے مطابق کیٹی زکریا نے سیاست میں آنے سے پہلے قانون کے شعبے میں کام کرنے کا دعویٰ کیا تھا، تاہم میڈیا کو امریکا کی کسی بھی ریاست یا واشنگٹن ڈی سی میں ان کی بطور وکیل رجسٹریشن کا کوئی ریکارڈ نہیں ملا۔

وال اسٹریٹ جرنل کے مطابق پیپرڈائن یونیورسٹی سے قانون کی ڈگری کے بعد وہ کیلیفورنیا کا بار امتحان پاس نہ کر سکیں۔ کیلیفورنیا اسٹیٹ بار نے سی این این کو تصدیق کی ہے کہ ان کے پاس ریاست میں وکالت کا کوئی لائسنس نہیں ہے۔

کیلیفورنیا میں بغیر لائسنس خود کو وکیل ظاہر کرنے پر ایک سال قید یا ایک ہزار ڈالر جرمانہ ہو سکتا ہے۔ نگران تنظیم کیمپین فار اکاؤنٹیبلٹی نے ان کے خلاف تحقیقات کا مطالبہ کرتے ہوئے شکایت درج کرا دی ہے۔

ایک پریس کانفرنس میں جب پوچھا گیا کہ بار امتحان کس ریاست سے پاس کیا، تو ٹرمپ کے ہمراہ کھڑی کیٹی زکریا نے جواب دیا کہ جب وہ چین منتقل ہوئی تھیں۔ مگر چینی قانون کے مطابق صرف چینی شہری ہی وہاں وکالت کا لائسنس لے سکتے ہیں، جس سے ان کے چین میں سینیئر قانونی مشیر کے طور پر کام کے دعوے پر بھی سوال اٹھ گیا ہے۔

وائٹ ہاؤس کے ترجمان اسٹیون چیونگ نے ان کا دفاع کرتے ہوئے کہا کہ وہ انتہائی اہل اور ذہین ہیں۔ خود کیٹی زکریا کا کہنا ہے کہ انھوں نے بین الاقوامی لین دین کے قانون کی پریکٹس کی اور تمام مناسب اسناد رکھتی ہیں۔

42 سالہ کیٹی زکریا نے 2011 میں پیپرڈائن سے قانون کی ڈگری لی تھی، مگر امریکا میں صرف ڈگری وکالت کا لائسنس نہیں ہوتی۔